O Pharraimos le Tubasko ay leske śàvengo

 

 

O Tuba tràdel, la ćugnyasa màrel

Anda vóya làśi śukàres gyilàbel

O Milan ay o Kolya gyinaven e patra

V’el trin morcosayle sarso khère res’na

 

E ungri źandàra v’ando kher ay àvral

Ćiden sa le murśen, vi koles so làngal

“Av tar manca rromnye źi po àllomàśi

Khote phenav tuke murro sàmitàśi”

 

Ek phàri romnyòrri le śingàlenge dela

O Kolya ay o Milan này sar te muntun la

Le dades, le śaven ingren pe e gàra

La bòra puśke dine, ke voy ći das pàća

 

O ungriko làgeri o fòro ‘Komàrom’

Pa playa śuden lenge ćorro śùko mànrro

“Te śindyol tèle mamo o nyamcicko pòdo

Te na phìrel pe les o nàzisko gàźo”

 

O duyto làgeri ando Dachau rakhel pe’

Màrde-bokhàrde, mudàrde, śingerde

V’o dad, v’el śave tason ando gàzo

Ke lela lengo trajo o mulàno gàźo

 

Aven sovjetura, av’nas te muntun le

Anglunes so keren, sila pe romnyande

Źi kana aresen, maj but źène mèren

Ande e làgera e àsva nàstik pèren

 

Tuba, Milan, Kolya, e bòri t’an ertome

Taj sa le àver manuś so sas khote xasàrde

Màr tyo Sunto Udud Devla pe mùlende

So ando Pharraimos mùle làgeronde

 

o Gyusi el Ràmosko

po 27to Januari ando 2021